Қазығұрт ауданының әкімі Азизхан Исмаилов Тұрбат ауылдық округіне арнайы іссапармен барып, өңірдегі ауыл шаруашылығы саласының дамуына серпін беріп отырған бірқатар ірі шаруашылықтардың тыныс-тіршілігімен танысты. Іссапар барысында аудан басшысы «Сайдусман ата» және «Пасека Бал» шаруа қожалықтарының жұмысын көріп, агроөндірістік кешендердің даму деңгейіне оң бағасын берді.
«Сайдусман ата» – Қазығұрттағы заманауи агроөндіріс ошағы
Алдымен аудан әкімі «Сайдусман ата» шаруа қожалығына ат басын тіреді. Бұл қожалық – Қазығұрт өңірінде көкөніс өндірісін заманауи технологиялармен дамытып отырған іргелі агроқұрылымдардың бірі. Жалпы көлемі 4 гектарды құрайтын жылыжай кешенінде көкөніс дақылдарымен қатар, көшет өсіру де қарқынды жолға қойылған.
Нақтырақ айтқанда, жылыжайдың 1 гектары көкөніс көшеттерін өсіруге, қалған 3 гектары қызанақ пен қияр секілді көкөністерді өндіруге арналған. Қожалық жылына екі маусымда шамамен 600 тонна өнім жинайды, оның 360 тоннасы – қызанақ, 240 тоннасы – қияр. Өндірілген өнім тек аудан көлемінде ғана емес, еліміздің өзге де өңірлеріне жөнелтіледі.
Айта кетерлігі, шаруашылықта 32 тұрақты жұмысшы еңбек етеді. Сонымен бірге, маусымдық жұмыстар кезінде қосымша 80 адам жұмыспен қамтылады. Бұл – ауыл тұрғындарын жұмыспен қамтамасыз етуге, әлеуметтік жағдайды жақсартуға айтарлықтай үлес қосып отырған маңызды көрсеткіш.
Сонымен қатар, шаруашылықта жыл сайын 5 миллион данаға дейін түрлі көкөніс көшеттері өсіріліп, жергілікті фермерлер мен жеке тұрғындарға жеткізіледі. Бұл – ауданның агроөндірістік әлеуетін арттыруға бағытталған кешенді жұмыстардың нақты нәтижесі.
«Пасека Бал» – гүл өсіруді қолға алған бірегей шаруашылық
Іссапар барысында Азизхан Исмаилов «Пасека Бал» шаруа қожалығына да барды. Бұл қожалық тек көкөніс өсірумен ғана шектелмей, гүл шаруашылығына да басымдық беріп отырған ауыл шаруашылығы нысаны. Жылыжайдың жалпы аумағы – 2 гектар. Оның ішінде 0,65 гектарына қияр егілсе, 1,35 гектар алқапта әртүрлі раушан гүлдері өсіріледі.
Жыл сайын мұнда 502 мың данаға дейін раушан гүлі, 60 тонна қияр өндіріліп, тұтынушыларға ұсынылады. Бұл көрсеткіш шаруашылықтың нарықтағы сұранысты тиімді пайдаланып, жаңа бағыттарға бет бұрғанын көрсетеді.
Қожалықтың иелігінде 18 гектар егістік жер бар, оның ішінде 2 гектар – суармалы алқап. Мұнда ауыл шаруашылығы дақылдарын егумен қатар, бал арасын өсіру бағытында да жұмыстар жүргізіледі. Қожалықта 20 тұрақты жұмысшы еңбек етсе, маусымдық кезеңде тағы 30 адам уақытша жұмыспен қамтылады.
Аудан басшысы оң бағасын берді
Тұрбат ауылдық округіндегі аталған шаруашылықтар жұмысымен танысқан аудан әкімі Азизхан Исмаилов агроқұрылымдардың даму қарқынына оң бағасын беріп, алдағы уақытта ауыл шаруашылығын одан әрі өркендету үшін қажетті қолдау шаралары жалғасын табатынын жеткізді.
– Қазығұрт ауданы ауыл шаруашылығы саласында үлкен әлеуетке ие. Бүгінгі көріп отырған шаруашылықтар – соның жарқын мысалы. Заманауи технологияны игеру, еңбек өнімділігін арттыру, жаңа жұмыс орындарын ашу – бұл біздің басты мақсаттарымыздың бірі. Мұндай іргелі шаруашылықтардың саны арта берсе, ауданның экономикалық жағдайы да тұрақты бола түседі, – деді аудан әкімі.
Іссапар соңында аудан басшысы шаруашылық иелерімен пікір алмасып, алдағы жоспарларымен танысты. Сонымен қатар, мемлекеттік бағдарламалар аясында ауыл шаруашылығын дамыту бағытында көрсетілетін қолдаулар туралы айтып өтті.
Қазығұрт ауданында ауыл шаруашылығы саласының тұрақты дамуы – осындай ірі және заманауи шаруашылықтардың нәтижелі еңбегінің арқасы. «Сайдусман ата» мен «Пасека Бал» секілді агроқұрылымдардың тәжірибесі өзге кәсіпкерлер үшін үлгі болары сөзсіз. Аудан әкімдігі тарапынан көрсетілетін қолдау мен кәсіпкерлердің табандылығы – өңірдің ауыл шаруашылығын жаңа белестерге көтермек.
