Түркістан қаласы алғаш рет өткізген халықаралық кітап көрме-жәрмеңкесі мәдениет пен әдебиеттің тамаша байланыс алаңы болып табылады. Бұл іс-шараның басты мақсаты – кітапсүйер қауымды, қаламгерлер мен оқырмандарды бір арнада тоғыстырып, әлем әдебиетінің ең үздік туындыларымен таныстыру, сондай-ақ оқырмандардың әдебиетке деген қызығушылықтарын арттыру. Көрме, сондай-ақ, әртүрлі елдер мен мәдениеттер арасында әдеби байланысты нығайтуға бағытталған.
Түркістан төріндегі «Turkistan Book Fair» халықаралық кітап көрме-жәрмеңкесі өте кең көлемде ұйымдастырылды. Оның ауқымына 50-ге жуық баспа ұйымы қатысып, кітап нарығындағы түрлі бағыттағы басылымдарын көпшілікке ұсынды. Атап айтқанда, көрмеге Түркия, Өзбекстан, Әзербайжан, Қырғызстан, Саха Республикасы (Якутия), Ресей және Моңғолия сияқты мемлекеттерден көптеген баспа ұйымдары қатысты. Бұл шетелдік қатысушылар көрмеге түрлі жанрдағы кітаптарын алып келіп, көрме қызығушылығын одан сайын арттырды.
Көрмеде қазақ баспалары да кеңінен таныстырылды. «Атамұра», «Алматыкітап баспасы», «Қасым» баспа үйі, «Мазмұндама», «Меломан» сынды отандық баспалар өздерінің үздік өнімдерін ұсынды. Бұл баспалар қазақ әдебиетінің жаңа беттерін ашуға атсалысқан туындылармен оқырман қауымын қуантты.
Түркістан облысы әкімдігінің қолдауымен ұйымдастырылған көрме аясында «Фолиант» баспасы мен ТҮРКСОЙ халықаралық ұйымы ауқымды шаралар өткізді. Шараға келген көпшілік арасында әдебиет жанашырлары мен кітапсүйер қауымның қатары көп болды. Әсіресе, балалар мен жасөспірімдерге арналған іс-шаралар қызықты өтті. Сұлтан Раевтың «Жанжаза» романы, Несіпбек Айтұлының «Ләйлі-Мәжін» дастаны, Ұларбек Дәлейұлының «Бату хан» тарихи-деректі романы сияқты жаңа кітаптардың тұсауы кесілді.
Танымал қаламгерлердің шығармашылығына арналған арнайы кездесулер ұйымдастырылды. Олардың ішінде Баянғали Әлімжанов, Ұларбек Дәлейұлы және басқа да ақын-жазушылардың қатысуымен өткен шығармашылық кездесулер ерекше атап өтуге тұрарлық. Кездесулер барысында Баянғали Әлімжанов балаларға арналған 100-ден астам кітапты мектептер мен кітапханаларға сыйға тартты. Бұл игі іс оқырман мен жазушы арасындағы байланысты нығайтып, әдебиетке деген қызығушылықты арттырды.
Көрменің басты ерекшелігі – балалар алаңында өткізіліп жатқан түрлі іс-шаралар болды. Бұл алаңда балалар кітап оқуға баулып қана қоймай, түрлі шеберлік сағаттары, оқырмандар кездесулері, кітап оқу байқаулары сияқты қызықты іс-шаралар ұйымдастырылды. Мұндай іс-шаралар балалардың кітапқа деген сүйіспеншілігін арттыруға көмектесті, сондай-ақ отбасылық оқуды насихаттаудың тиімді жолы болды.
Көрме барысында әртүрлі әдеби талқылаулар мен кездесулер де өтті. Бұл кездесулерге қатысушылар тек кітаптармен танысып қана қоймай, әдеби шығармаларды талқылауға да мүмкіндік алды. Шыңғыс Айтматовтың «Қош бол, Гүлсары» шығармасы подкаст форматында талқыланды. «КітапХан» жобасының негізін қалаушы Хамит Ердехан шығарманы таныстырып, қатысушылар өз ойларын ортаға салды. Бұл әдеби кездесулер мен талқылаулар көрмеге келгендер үшін өте қызықты әрі пайдалы болды.
Жәрмеңке барысында кітаптар баспа бағасымен ұсынылып, оқырмандарға арнайы жеңілдіктер жасалды. Сонымен қатар, көптеген баспалар өздерінің шығармаларын сыйға тартты, бұл оқырмандар арасында ерекше қуаныш тудырды. Көрмеде кітаптардың әртүрлі жанрлары мен тақырыптары ұсынылды, бұл өз кезегінде оқырмандардың таңдауының кең ауқымын қамтамасыз етті.
Түркістандағы халықаралық кітап көрме-жәрмеңкесі кітап сүйер қауым үшін үлкен мәдени оқиға болды. Әдебиетке деген махаббатты арттырып, жазушылар мен оқырмандар арасында тығыз байланыс орнатылды. Бұл шара Түркістанның мәдени орталық ретінде беделін тағы да бір қадам алға жылжытты. Көрмеде орын алған әртүрлі мәдени және шығармашылық іс-шаралар оқырмандар мен авторларды жақындастырып, әдебиеттің жаңа биіктеріне жол ашты.
Келешекте Түркістан қаласында осындай ауқымды мәдени шаралар жиі ұйымдастырылып, әдебиет пен мәдениетке деген сүйіспеншілік пен қызығушылықты одан әрі арттырары сөзсіз.
