Түркістан облысында шетелдік инвестицияларды тарту бағытындағы жұмыстар жүйелі түрде жалғасып, нақты нәтижелерге бағытталуда. Осы орайда облыс әкімі Нұралхан Көшеров шетелдік, оның ішінде қытайлық инвесторлармен ресми кездесу өткізіп, өңірде бірлескен инвестициялық жобаларды жүзеге асыру мәселелерін талқылады.
Кездесу барысында екі тарап өзара ынтымақтастықты нығайтуға бағытталған бірқатар нақты ұсыныстар мен жоспарларды ортаға салды. Облыс басшысы Түркістан өңірінің инвестициялық әлеуетіне жан-жақты тоқталып, оның тиімді географиялық орналасуы, дамыған көлік-логистикалық мүмкіндіктері, табиғи ресурстар қоры мен еңбек ресурстарының жеткілікті екенін атап өтті.
Нұралхан Көшеров инвесторларға мемлекет тарапынан көрсетілетін қолдау тетіктері туралы кеңінен ақпарат берді. Атап айтқанда, инвесторларға арналған салықтық және кедендік жеңілдіктер, индустриялық аймақтар мен арнайы экономикалық аймақтардың мүмкіндіктері, сондай-ақ жобаларды іске асыру барысында әкімдік тарапынан көрсетілетін толық сүйемелдеу шаралары таныстырылды. Бұл механизмдер инвесторлар үшін қолайлы әрі сенімді орта қалыптастыруға бағытталған.
Облыс әкімі инвестициялық ахуалды жақсарту өңір басшылығының басты басымдықтарының бірі екенін атап өтіп, бұрын жүргізілген келіссөздер мен уағдаластықтардың нақты іске асуына басымдық берілетінін жеткізді. Оның айтуынша, келісімдер қағаз жүзінде қалмай, өндірісті іске қосу, жаңа жұмыс орындарын ашу және өңір экономикасын дамытуға нақты үлес қосуы тиіс.
Өз кезегінде қытайлық инвестор өңірдің әлеуетіне жоғары баға беріп, өндіріс, қайта өңдеу, ауыл шаруашылығы және өзге де бағыттар бойынша бірлескен жобаларды жүзеге асыруға қызығушылық танытты. Тараптар алдағы уақытта ынтымақтастықты нақты жобалармен бекітіп, ұзақ мерзімді әріптестік орнатуға уағдаласты.
Айта кету керек, Түркістан облысы соңғы жылдары инвестиция тарту бойынша еліміздегі қарқынды дамып келе жатқан өңірлердің бірі саналады. Мұндай кездесулер аймақтың экономикалық әлеуетін арттырып қана қоймай, халықаралық іскерлік байланыстарды кеңейтуге, жаңа технологиялар мен тәжірибелерді енгізуге жол ашады.
