2025 жылдың қорытындысы бойынша Түркістан облысы ел көлемінде қысқа мерзімді экономикалық өсім көрсеткіші жөнінен үздік үштіктің қатарынан көрініп, әлеуметтік-экономикалық даму қарқынын сақтап қалған өңірлердің біріне айналды. Бұл – жүйелі басқару, нақты индикаторлар арқылы жұмыс тиімділігін бағалау және жауапкершілікті күшейту бағытындағы кешенді шаралардың нәтижесі.
Облыс әкімдігі ғимаратында өткен кеңейтілген алқа отырысында аймақтың өткен жылғы даму көрсеткіштері жан-жақты талқыланды. Жиынға облыс әкімі Нұралхан Көшеров төрағалық етті. Басқосуға облыс әкімінің орынбасарлары, аудан және қала әкімдері, басқарма басшылары мен жауапты сала жетекшілері қатысты.
Алқа отырысында 2025 жылдың қорытындысы бойынша өңірдің әлеуметтік-экономикалық даму нәтижелері қаралды. Өңір басшысы өткен жылы облыс экономикасында оң динамика сақталғанын атап өтті. Қысқа мерзімді экономикалық өсім 113,9 пайызды құрап, Түркістан облысы республика бойынша үшінші орынға тұрақтады. Ауыл шаруашылығы саласында өнім көлемі 1226 млрд теңгені құрап, өсім 100,6 пайыз деңгейінде қалыптасты. 2025 жылы қуаңшылық пен жауын-шашынның аз болуы әсер етпегенде көрсеткіш бұдан да жоғары болатын еді. Дегенмен республика көлемінде өндірілген ауыл шаруашылығы өнімі бойынша облыс бірінші орында тұр.
Кеңейтілген алқа отырысында аудан, қала әкімдіктері мен облыстық басқармалардың қызметтік тиімділігі жан-жақты бағаланды. Қаржы және мемлекеттік активтер басқармасының басшысы Гүлфари Әжіметованың айтуынша, бағалау жүйесі 9 блоктан және 97 индикатордан тұрады. 2025 жылдың қорытындысы бойынша қызметтік тиімділік рейтингінің көш басында Сауран, Жетісай және Созақ аудандары тұр. Ал соңғы орындарында Бәйдібек ауданы, Кентау және Арыс қалалары жайғасты. Облыс әкімі бұл аумақтарда бекітілген көрсеткіштерге қол жеткізілмеуі тиісті жұмыстардың жеткілікті деңгейде жүргізілмегенін көрсететінін атап өтіп, аталған аудан және қала әкімдерінің есептерін тыңдады.
– Аудан, қала әкімдері және басқарма басшылары орындаушылық тәртіпті тікелей жеке бақылауларына алып, халықпен тығыз кері байланыс орнатуға тиіс. Бүгін әкімдіктің кеңейтілген алқа отырысында облыстың әлеуметтік — экономикалық дамуына әсер ететін өзекті мәселер талқыланды. Жыл басынан бері бекітілген индикаторларға қол жеткізбеген аудан, қала әкімдіктері мен басқармалардың 25 лауазымды тұлғасына тәртіптік шара көрілді. Мақсат – шара көру емес, бекітілген межеге қол жеткізу. Сондықтан, орынбасарларыма аудан, қала әкімдері мен облыстық басқарма басшылары әрбір индикатордың толық орындалуын қамтамасыз ету бойынша нақты шараларды мерзімінде қабылдауды тапсырамын. Көш соңындағы үш аудан, қала мен басқарма басшыларына тәртіптік шара қаралады. 2026 жылға бекітілген индикаторлар мен тапсырмаларды сапалы орындау үшін жұмысты күшейтіңіздер. Мақсат – өңірдің экономикалық әлеуетін көтеру, өндіріс орындарын ашу, инвестиция тарту және барлық салада жоғары нәтижеге қол жеткізу – деді Түркістан облысының әкімі Нұралхан Көшеров.
Жиын барысында елімізде басталған Конституциялық реформа мәселесі де қозғалды. Жаңа Конституция жобасы азаматтардың құқықтары мен бостандықтарын қорғауды күшейтуге, мемлекеттік басқару жүйесін жаңғыртуға және әділетті, ашық әрі құқықтық мемлекет қалыптастыруға бағытталғаны атап өтілді.
Алқа отырысын қорытындылаған облыс әкімі Нұралхан Көшеров орынбасарларына, аудан-қала әкімдері мен басқарма басшыларына әрбір бекітілген индикатордың орындалуын жеке бақылауға алып, нақты нәтижеге бағытталған жүйелі жұмыс жүргізуді тапсырды.
Түркістан облысының қысқа мерзімді экономикалық өсім бойынша республикада үздік үштікке енуі – өңірде жүргізіліп жатқан жүйелі реформалар мен жауапты басқарудың нәтижесі. Нақты индикаторларға негізделген бағалау жүйесі әкімдердің жұмысын саралап қана қоймай, олардың тиімділігін арттыруға серпін беріп отыр.
Алдағы кезеңде облыс басшылығы экономикалық өсімді сақтап қана қоймай, оны жаңа деңгейге көтеруді көздеп отыр. Инвестиция тарту, өндірісті дамыту, ауыл шаруашылығын әртараптандыру және әлеуметтік инфрақұрылымды жетілдіру – негізгі басымдықтар қатарында.
Басты мақсат – Түркістан облысын ел экономикасының қуатты тіректерінің біріне айналдыру және халықтың өмір сүру сапасын арттыру.
