Түркістан облысы әкімдігінде мемлекеттік сатып алу саласында 2025 жылы атқарылған жұмыстардың қорытындысы шығарылып, 2026 жылға арналған басым бағыттар айқындалды. Аппараттық мәжілісте өңір әкімі жауапты басқарма басшылары мен аудан, қала әкімдеріне нақты тапсырмалар жүктеп, бюджет қаражатын тиімді әрі ашық игеру мәселесін басты назарға алды.
Жиында мемлекеттік сатып алу рәсімдерінің заң талаптарына сәйкестігі, жоспарлау сапасы, конкурс өткізу мерзімдері мен анықталған заңбұзушылықтар кеңінен талқыланды. Өңір басшысы мемлекеттік сатып алу – бюджет қаржысын игерудің негізгі тетігі екенін атап өтіп, бұл бағыттағы жауапкершілікті күшейту қажеттігін жеткізді.
Түркістан облысы әкімдігінде мемлекеттік сатып алу саласында 2025 жылы атқарылған жұмыстардың қорытындысы шығарылып, 2026 жылға арналған жоспарлар қаралды. Аппараттық мәжілісте облыс әкімі Нұралхан Көшеров жауапты сала басшылары мен аудан, қала әкімдеріне нақты тапсырмалар жүктеді.
– Мемлекеттік сатып алу рәсімдерінде орын алған кемшіліктерді алдағы уақытта болдырмау үшін қажетті шаралар қабылдап, қызметкерлердің біліктіліктерін арттыру қажет.
Облыста мемлекеттік сатып алу рәсімдерін қолданыстағы заңнамаға сәйкес, өз мерзімдеріне өткізуді, мемлекеттік сатып алудың жылдық жоспарын бекітуді, жүйелі түрде заңнаманы бұзатын аудан, қала әкімдіктері мен облыстық басқармалар бойынша рейтинг әзірлеп, ай сайын нәтижесін баяндауды тапсырамын. Бюджетті ел мүддесіне сай тиімді жұмсап, өңірдің проблемаларын шешу бойынша нақты жұмыс жүргізіңіздер, – деді Нұралхан Көшеров.
Мәжілісте облыстық мемлекеттік сатып алу басқармасының басшысы Ақәділ Сатыбалды баяндама жасап, өңірдегі сатып алу рәсімдерінің жай-күйі мен анықталған заңбұзушылықтар жөнінде баяндады. Оның айтуынша, 2025 жылы Түркістан облысының мемлекеттік сатып алу жылдық жоспары 339,7 млрд теңгені құрап, 117 мыңнан астам тармақты қамтыған. Оның 60 пайыздан астамы облыстық басқармаларға тиесілі.
2026 жылға облыстың мемлекеттік сатып алу жоспары 219,1 млрд теңгені құрап отыр. Алдағы кезеңде басқарма тарапынан сатып алуларға тұрақты мониторинг жүргізу, бәсекелестік тәсілдерді кеңейту, отандық және жергілікті тауар өндірушілерге басымдық беру, сондай-ақ заңбұзушылықтардың алдын алу шараларын күшейту жоспарланған.
Жиында заңнаманы жүйелі түрде бұзатын аудан, қала әкімдіктері мен облыстық басқармалар бойынша арнайы рейтинг әзірлеу ұсынылды. Ай сайын қорытындысы баяндалып, жауапты тұлғалардың жұмысына нақты баға берілмек.
Сарапшылардың пікірінше, мұндай тәсіл жауапкершілікті арттырып, саладағы тәртіпті нығайтады. Әсіресе, бюджет қаржысын игеру барысында ашықтықты қамтамасыз ету – сыбайлас жемқорлық тәуекелдерін төмендетудің маңызды факторы.
Мемлекеттік сатып алу – тек рәсімдер жиынтығы емес, ол өңірдің әлеуметтік-экономикалық дамуына тікелей әсер ететін құрал. Жол, мектеп, аурухана, коммуналдық инфрақұрылым сияқты маңызды нысандардың сапалы әрі уақытылы салынуы осы саладағы жұмыстың нәтижесіне байланысты.
Түркістан облысында алдағы кезеңде мемлекеттік сатып алу жүйесін жетілдіру арқылы бюджет қаражатының әр теңгесін тиімді пайдалану көзделіп отыр. Бұл өз кезегінде өңір тұрғындарының өмір сапасын арттыруға, әлеуметтік мәселелерді шешуге және экономикалық белсенділікті күшейтуге ықпал етпек.
Жиын қорытындысында жауапты басқармаларға нақты мерзімдер белгіленіп, мемлекеттік сатып алу саласын сапалы жаңа деңгейге көтеру міндеті жүктелді.
