Түркістан облысының дарынды оқушылары халықаралық деңгейде үлкен жетістікке қол жеткізіп, еліміздің абыройын асқақтатты. Робототехника мен инженерлік шығармашылық бағытындағы ең ірі іс-шаралардың бірі – ALEM TECH FEST — 2026 фестивалінде облыс намысын қорғаған командалар жоғары нәтижелерге қол жеткізді.
Әлемдік деңгейдегі дода
“ALEM TECH FEST — 2026” фестивалі – Қазақстан мен Орталық Азиядағы робототехника, жасанды интеллект, STEM және инженерлік инновациялар саласындағы ең ауқымды алаңдардың бірі. Биылғы фестиваль 15 000 шаршы метр аумақта ұйымдастырылып, оған Қазақстан, Қырғызстан, Өзбекстан, Түрікменстан, Эстония, Гонконг және Вьетнам елдерінен 5000-нан астам оқушы қатысты.
Фестиваль аясында Central Asia FIRST Championship халықаралық чемпионаты өтіп, жас инженерлер өз жобаларын қорғап, роботтарын сынға салды. Сонымен қатар, Alem Drone League дрон жарыстары, гуманоид роботтар сайысы, RoboCup, Battle of Bots және Hour of AI бағыттары көрермендер назарына ұсынылды.
🏆 “TOLEBI DARYN” – Бас жүлде иегері
FLL Challenge санаты бойынша Түркістан облысының намысын қорғаған Төлеби ауданының мамандандырылған мектеп-интернатының “TOLEBI DARYN” командасы жарыстың ең жоғары марапаты – “Champions Award Winner” Бас жүлдесін жеңіп алды.
Бұл – команданың инновациялық жобасы, роботтың техникалық сапасы және командалық жұмысының жоғары деңгейде бағаланғанының дәлелі.
Осы жеңістің нәтижесінде оқушылар 2026 жылғы 29 сәуір – 2 мамыр аралығында АҚШ-тың Хьюстон қаласында өтетін әлемдік деңгейдегі FIRST Championship чемпионатына жолдама алды. Аталған додаға 192 мемлекеттен командалар қатысады. Түркістандық жас дарындар бұл жарыста Қазақстан Республикасының намысын қорғамақ.
“Union Tur” – 4 жылдық грант иегерлері
FIRST Tech Challenge санаты бойынша Қазығұрт ауданынан қатысқан “Union Tur” командасы үлкен жетістікке жетіп, 4 жылдық оқу гранттарын жеңіп алды.
Команданың аға жетекшілері:
Оразхан Бексұлтан – Қалаубек Тұрсынқұлов атындағы мектеп-гимназиясының информатика және робототехника пәні мұғалімі
Үстенов Нұрсұлтан – Қаныш Сәтпаев атындағы мектеп-лицейінің информатика және робототехника пәні мұғалімі
Ұстаздардың кәсіби біліктілігі мен оқушылардың ізденісі нәтижесінде команда халықаралық деңгейде жоғары бағаланды.
“Qazygurt” командасының табысы
FIRST LEGO League Challenge бағыты бойынша “Qazygurt” командасы жоғары нәтиже көрсетіп, “MOTIVATE AWARD” және “BEST PID AWARD” кубоктарына ие болды.
Нәтижесінде қазығұрттық оқушылар Қытай астанасы Бейжің қаласында өтетін China FIRST LEGO League Off-Season — 2026 турниріне жолдама алды.
Түркістан облысының оқушылары халықаралық аренада тек техникалық білімін ғана емес, сондай-ақ көшбасшылық, командалық жұмыс және инновациялық ойлау қабілеттерін де дәлелдеді.
Бұл жетістіктер – өңірдегі білім беру сапасының, STEM бағытындағы жүйелі жұмыстың және ұстаздар мен оқушылардың тынымсыз еңбегінің айқын нәтижесі.
Алдағы уақытта АҚШ пен Қытайда өтетін халықаралық чемпионаттарда да түркістандық жас дарындар Қазақстанның көк байрағын биікке көтеретініне сенім мол.
Түркістан облысының дарынды жастарына сәттілік тілейміз!
