2026 жылғы 29 қаңтар мен 2 ақпан аралығында Алматы қаласында аралас жекпе-жектен (ММА) мастерлік турнир және «Үздік бапкер» халықаралық турнирі өтті. Бұл жарыс Орталық Азия елдерінен келген спортшылар үшін нағыз кәсіби деңгейдегі сынақ болып табылады. Турнирге Қазақстан, Тәжікстан, Қырғызстан және Өзбекстан мемлекеттерінен келген спортшылар қатысты, жалпы саны 400-ге жуық спортшы бақ сынады.
Жарыстың басты ерекшелігі – әр қатысушы өз салмақ дәрежесінде шеберлігін көрсетуге мүмкіндік алды. Турнир барысында қатысушылар тек физикалық дайындықтарын ғана емес, сонымен қатар тактикалық ойлау, шыдамдылық және рухани төзімділігін де көрсетті.
Сайрам ауданынан келген спортшылар бұл додада ерекше көзге түсті. Атап айтқанда:
30 кг салмақ дәрежесінде Кадирметов Ибрахим І орынға ие болды.
40 кг салмақ дәрежесінде Алиев Жалал жеңімпаз атанды.
50 кг салмақ дәрежесінде Қанатұлы Доснар бірінші орынды иеленді.
60 кг салмақ дәрежесінде Юлдашев Абдуарим І орынға шығып, үлкен табысқа қол жеткізді.
40 кг салмақ дәрежесінде Жусипов Юсуф ІІІ орынмен шектелді.
Арнайы атап өту керек, 60 кг салмақ дәрежесінде жеңімпаз атанған Юлдашев Абдуарим бұл турнирде мастер спорт нормативін орындап, кәсіби деңгейде жаңа биіктерге жеткенін дәлелдеді. Бұл оның спорттық мансабында айрықша маңызды жетістік болып саналады.
Жалпы, сайрамдық спортшылардың көрсеткен нәтижесі аудан үшін үлкен мақтаныш. Олар өздерін халықаралық аренада танытып қана қоймай, келешек жастарға үлгі болып отыр. Турнирдің ұйымдастырушыларының айтуынша, алдағы уақытта осындай халықаралық жарыстар Қазақстанның әртүрлі аймақтарында жиі өткізілетін болады, бұл ел спортының дамуына жаңа серпін береді.
Сайрам ауданының спортшыларының табысы – бұл ең алдымен жүйелі дайындық, тәлімгерлердің кәсіби шеберлігі мен спортшылардың қажырлы еңбегінің жемісі. Әрбір жеңіс – спорттық рухтың, тәртіп пен төзімділіктің көрінісі.
Алдағы уақытта оларды жаңа жарыстарда да жоғары нәтижелер күтіп тұрғаны анық. Жастардың арманы – әлемдік аренада Қазақстанның намысын қорғау және өздеріне лайықты биіктерді бағындыру. Сайрамдық спортшылар дәл осындай мүмкіндікті көрсете білді.
