Түркістан облысында өңір экономикасын әртараптандыру, инвестициялық ахуалды жақсарту және отандық өндірісті дамыту бағытында ауқымды жобалар кезең-кезеңімен жүзеге асырылып келеді. Соның жарқын дәлелі ретінде Түркістан қаласында жылына 10 миллион метр джинсы матасын өндіретін заманауи зауыттың құрылысы басталды. Аталған өндіріс орны өңірдің ғана емес, жалпы Қазақстанның жеңіл өнеркәсіп саласындағы стратегиялық маңызды жобалардың бірі саналады.
Жаңа кәсіпорынның іргетасын қалау рәсіміне Түркістан облысының әкімі Нұралхан Көшеров пен «Hygeia Textile Kazakhstan» жауапкершілігі шектеулі серіктестігінің директоры Жин Ёуйй қатысып, мақта-мата жібін иіру және джинсы маталарын өндіру желілерінің құрылысына арналған капсуланы салды. Бұл – өңірде тоқыма өндірісінің толық циклін қалыптастыруға бағытталған нақты қадам.
Жеңіл өнеркәсіптегі стратегиялық жоба
Салтанатты рәсім барысында облыс әкімі Нұралхан Көшеров аталған жобаның маңыздылығына ерекше тоқталды. Оның айтуынша, Мемлекет басшысы Қасым-Жомарт Тоқаевтың биылғы Жолдауында еліміздің жаңа экономикалық бағыты айқындалып, экономиканы әртараптандыру, инновация мен цифрлық технологияларға негізделген өндірістерді дамыту басты басымдық ретінде белгіленген.
– Бүгін Түркістан өңірінің жеңіл өнеркәсіп саласында стратегиялық маңызы бар жобаның іргетасы қаланып отыр. «Turan» арнайы экономикалық аймағында орналасатын бұл зауыт – мақта кластерін дамыту жолындағы маңызды буын. Біз Түркістан облысында өсірілетін мақтаны 100 пайыз өзімізде өңдеп, қосылған құны жоғары дайын өнім шығаруды мақсат етіп отырмыз. Соның бірі – осы джинсы маталарын өндіретін зауыт. Бұл кәсіпорын еліміздің тоқыма өнеркәсібін жаңа деңгейге шығарады, – деді өңір басшысы.
Өндірістік қуат пен экспорттық әлеует
Жобаның негізгі көрсеткіштері де ауқымды. Зауыт іске қосылғаннан кейін жыл сайын 30 мың тонна мақта-мата жібі және 10 миллион метр джинсы матасы өндірілмек. Өндірілген дайын өнімдер ішкі нарықпен қатар Еуропа және Орталық Азия елдеріне экспортқа бағытталады. Бұл Қазақстанның экспорттық әлеуетін арттырып, отандық өнімнің халықаралық нарықтағы бәсекеге қабілеттілігін күшейтеді.
Жобаның жалпы инвестициялық құны 23,3 млрд теңгені құрайды. Ең маңыздысы – бұл жоба толықтай жеке инвесторлардың қаржысы есебінен жүзеге асырылуда. Бұл Түркістан облысының инвестиция тарту бағытындағы жұмыстарының нәтижелі екенін көрсетеді.
Мыңнан аса жаңа жұмыс орны
Жаңа зауыттың әлеуметтік-экономикалық тиімділігі де жоғары. Кәсіпорын толық іске қосылғанда мыңнан аса жаңа жұмыс орны ашылады деп жоспарлануда. Бұл өңір тұрғындарының тұрақты жұмыспен қамтылуына, халықтың әл-ауқатын арттыруға оң әсер етеді. Сонымен қатар, зауыт жұмысына қажетті барлық жабдықтар ең заманауи технологиялармен қамтылып, өндіріс экологиялық талаптарға сай жүргізіледі.
Нысанның жалпы аумағы 20 гектарды құрайды. Құрылыс және іске қосу жұмыстары үш кезең бойынша жүзеге асырылмақ. Әр кезеңде өндірістік қуат біртіндеп арттырылып, технологиялық желілер толықтай енгізіледі.
Түркістан – тоқыма орталығына айналуда
Өңір басшысы атап өткендей, Түркістан облысы – жеңіл өнеркәсіпті, оның ішінде тоқыма саласын дамытуға өте қолайлы аймақ. Мақта шикізатының мол қоры, қолайлы климаттық жағдай, логистикалық мүмкіндіктер мен арнайы экономикалық аймақтардың болуы инвесторлар үшін үлкен артықшылық болып отыр.
– Бұл жаңа зауыт импортты алмастыруға және экспорттық бағытты күшейтуге арналған ірі жоба. Нысан іске қосылған кезде Түркістан Қазақстандағы жетекші тоқыма орталықтарының біріне айналары сөзсіз. Сондықтан жобаға үлес қосқан инвесторларға алғысымды білдіремін. Түркістанның өндірістік әлеуеті одан әрі дами берсін, – деді Нұралхан Көшеров.
Өнеркәсіп өсімі қарқынды
Жалпы, Түркістан облысында индустриалды аймақтар, шағын өндірістік парктер мен арнайы экономикалық аймақтардың жұмысын жандандыру нәтижесінде өнеркәсіп саласында айтарлықтай өсім байқалуда. Соңғы 10 айдың қорытындысы бойынша өңірде өндірілген өнеркәсіп өнімінің көлемі 1,3 трлн теңгеге жетіп, өсім деңгейі 113,4 пайызды құраған.
Бұл көрсеткіштер Түркістан облысының экономикалық даму бағытының дұрыс таңдалғанын және алдағы жылдары өңірдің еліміздің индустриялық-өндірістік картасындағы рөлінің арта түсетінін айқын көрсетеді.
Жылына 10 миллион метр джинсы матасын өндіретін зауыттың құрылысы – Түркістан облысының жеңіл өнеркәсіп саласындағы жаңа белесі. Бұл жоба өңір экономикасын әртараптандырып қана қоймай, отандық өнімнің экспорттық мүмкіндігін кеңейтіп, мыңдаған адамның өмір сапасын жақсартуға ықпал етеді. Түркістанның өндірістік әлеуеті артып, аймақ болашақта Қазақстанның тоқыма өнеркәсібіндегі негізгі орталықтарының біріне айналуы әбден мүмкін.
