Түркістан облысында Мемлекет басшысы Қасым-Жомарт Тоқаевтың елді мекендерді 100 пайыз сапалы ауыз сумен қамтамасыз ету жөніндегі тапсырмасы жүйелі түрде жүзеге асырылып келеді. Осы маңызды міндет аясында өңірде инфрақұрылымдық жобалар кезең-кезеңімен іске қосылып, ауыл тұрғындарының тұрмыс сапасын арттыруға бағытталған нақты қадамдар жасалуда. Соның бір айқын көрінісі – Келес ауданындағы Кеңдала мен Көгерту елді мекендерінде жаңа ауыз су нысандарының пайдалануға берілуі.
Бүгін аталған елді мекендер үшін тарихи маңызы бар күн болды. Түркістан облысы әкімінің бірінші орынбасары Зұлпыхар Жолдасов Келес ауданына арнайы жұмыс сапарымен келіп, Ақтөбе ауылдық округіне қарасты Кеңдала және Көгерту ауылдарында салынған ауыз су нысандарының ашылу салтанатына қатысты. Салтанатты жиында ол тұрғындарды көптен күткен қуаныштарымен құттықтап, бұл жобалардың Мемлекет басшысының тікелей тапсырмасына сәйкес жүзеге асырылғанын атап өтті.
– Қайтарылған активтерден түскен қаражат халықтың нақты қажеттіліктеріне бағытталуда. Ауыз су – өмір сапасының негізі. Сондықтан бұл нысандардың іске қосылуы ауыл тұрғындары үшін аса маңызды. Ендігі міндет – салынған инфрақұрылымның сапалы жұмысын қамтамасыз етіп, тұрғындарға үздіксіз әрі қауіпсіз қызмет көрсету, – деді Зұлпыхар Жолдасов.
Сонымен қатар облыс әкімінің бірінші орынбасары жергілікті атқарушы органдарға ауыз су жүйелерінің уақытылы күтіп-ұсталуы, техникалық талаптардың сақталуы және тұрғындардың өтініш-тілектеріне жедел жауап беру жөнінде нақты тапсырмалар жүктеді.
Іс-шара барысында Келес ауданының әкімі Жәнібек Ағыбаев та сөз алып, жаңа әлеуметтік нысандардың іске қосылуымен ауыл тұрғындарын құттықтады. Ол аудан көлемінде халықтың өмір сүру сапасын арттыру басты назарда екенін атап өтіп, алдағы уақытта да инфрақұрылымды дамыту бағытындағы жұмыстар жалғасатынын жеткізді.
– Бүгінгі ашылып отырған ауыз су нысандары – мемлекет тарапынан ауыл халқының әл-ауқатын жақсартуға жасалып жатқан қамқорлықтың нақты нәтижесі. Алдағы жылдары да жол, газ, электр және басқа да әлеуметтік маңызы бар жобалар кезең-кезеңімен іске асады, – деді аудан әкімі.
Жаңа ауыз су нысанының іске қосылуы Кеңдала елді мекенінің тұрғындары үшін үлкен қуаныш болды. Бұл ауылда 102 тұрғын үй, яғни 502 тұрғын таза әрі сапалы ауыз сумен толықтай қамтамасыз етілді. Ал Көгерту елді мекенінде пайдалануға берілген нысан арқылы 91 тұрғын үйдің 611 тұрғыны орталықтандырылған ауыз су жүйесіне қосылды. Бұрын суды тасып пайдалануға мәжбүр болған ауыл халқы үшін бұл – тұрмыстағы үлкен жеңілдік.
Мамандардың айтуынша, орталықтандырылған ауыз су жүйесінің енгізілуі тек тұрмыстық қолайлылықты арттырып қана қоймай, санитарлық-эпидемиологиялық жағдайдың жақсаруына, түрлі жұқпалы аурулардың алдын алуға да оң әсерін тигізеді. Бұл әсіресе балалар мен қарттардың денсаулығын қорғауда маңызды рөл атқарады.
Жалпы, Келес ауданы бойынша 13 елді мекенді ауыз сумен қамту жоспарланған. Қазіргі таңда 12 ауыз су нысанының құрылысы жүргізіліп жатыр. Олардың басым бөлігінде құрылыс-монтаж жұмыстары аяқталуға жақын. Жобалар толық іске асқан жағдайда аудан тұрғындарын сапалы ауыз сумен қамту деңгейі едәуір өсіп, ауылдардың әлеуметтік-экономикалық дамуына серпін береді.
Осылайша, Түркістан облысында жүзеге асырылып жатқан ауыз су жобалары ауыл халқының өмір сапасын жақсартуға бағытталған мемлекеттік саясаттың нақты нәтижесін көрсетіп отыр. Бұл жұмыстар өңірдің тұрақты дамуына, халықтың әлеуметтік жағдайын көтеруге және болашақ ұрпақтың денсаулығын нығайтуға зор үлес қоспақ.
