Түркістан облысының әкімі Нұралхан Көшеров Мақтаарал ауданына жасаған жұмыс сапары барысында өңір үшін стратегиялық маңызы бар мақта кластерін дамыту бағытында жүзеге асырылып жатқан бірқатар өндірістік нысандардың жұмысымен танысты. Аймақ басшысы мақта шикізатын өңдеу, дайын өнім шығару және экспорт көлемін ұлғайтуға бағытталған жобалардың өңір экономикасына қосар үлесін атап өтіп, жауапты сала басшыларына нақты тапсырмалар жүктеді.
«Cotton Makta» ЖШС: жаңғыртылған өндіріс, тұрақты жұмыс
Жұмыс сапары барысында облыс әкімі алдымен «Cotton Makta» жауапкершілігі шектеулі серіктестігінің мақта шикізатын өңдеу зауытында болды. Аталған кәсіпорын 2016 жылдан бері тұрақты жұмыс істеп келеді және өңірдегі ірі өндірістік нысандардың бірі саналады.
2023 жылы зауыт өндірістік қуатын арттыру мақсатында толық жаңғыртудан өткен. Жоба аясында Қытай Халық Республикасынан әкелінген заманауи құрал-жабдықтар орнатылып, технологиялық желілер жаңартылған. Соның нәтижесінде зауыттың жылдық өндірістік қуаттылығы 90 мың тоннаға дейін жеткен.
Қазіргі таңда кәсіпорында 150 адам тұрақты жұмыспен қамтылған. Ал мақта қабылдау мен өңдеу қызатын маусымдық кезеңде қосымша 250 адамға дейін уақытша жұмыс орындары ашылады. Бұл ауылдық жерде халықты жұмыспен қамтуға және әлеуметтік тұрақтылықты қамтамасыз етуге айтарлықтай үлес қосып отыр. Жобаның жалпы инвестициялық құны 3 млрд теңгені құрайды.
Шаруалармен тиімді әріптестік
Биылғы маусымда зауыт 57 мың тонна мақта шикізатын қабылдаған. Осы мақсатта 800-ден астам шаруа қожалығымен келісімшарт жасалып, ұзақмерзімді әріптестік орнатылған. Қабылданған мақта шикізатының 1 келісі оның сорттық ерекшелігіне қарай 250–270 теңге аралығында бағаланған.
Маусым барысында ауданда 11 мақта қабылдау бекеті жұмыс істеп, барлық шаруалармен толық әрі уақытылы есеп айырысу жүргізілген. Бұл өз кезегінде диқандардың зауытқа деген сенімін арттырып, алдағы жылдары егіс көлемін ұлғайтуға ынталандырып отыр.
Экспортқа бағытталған өнім
Бүгінгі күнге дейін зауытта 13 мың тонна мақта талшығы өңделген. Дайын өнімнің 80 пайызы Қытай Халық Республикасына экспортталса, қалған бөлігі Түркия еліне жөнелтілуде. Бұл көрсеткіш Мақтаарал мақтасының халықаралық нарықта сұранысқа ие екенін көрсетеді. Сонымен қатар экспорт көлемінің артуы өңір экономикасына валюталық түсім әкеліп, бюджет кірісін ұлғайтуға мүмкіндік береді.
«Хамро ата» ЖШС: мақта майын өңдеу – жаңа бағыт
Аймақ басшысы жұмыс сапары аясында «Хамро ата» ЖШС-ның мақта майын өңдеу зауытының құрылыс барысымен де танысты. Қазіргі таңда өндірістік нысанның құрылыс жұмыстары 80 пайызға аяқталған. Өндіріске қажетті барлық құрал-жабдықтар Қытай Халық Республикасынан толық көлемде сатып алынып, жеткізілген.
Жоба толық іске асқан жағдайда кәсіпорын жылына 5 мың тоннаға дейін мақта майын өндіретін болады. Бұл мақта кластеріндегі өнім түрлерін әртараптандырып, қосылған құны жоғары дайын өнім шығаруға жол ашады. Жобаның жалпы құны 1 млрд теңгені құрайды. Құрылыс жұмыстары 2025 жылдың мамыр айында басталған, ал зауытты пайдалануға беру 2026 жылға жоспарланып отыр.
Өңір экономикасы үшін стратегиялық маңыз
Жұмыс сапарының қорытындысы бойынша облыс әкімі Нұралхан Көшеров кәсіпорын басшыларына, салалық басқарма жетекшілеріне және аудан әкіміне бірқатар нақты тапсырмалар берді. Атап айтқанда, өндірісті әртараптандыру, қосымша жұмыс орындарын ашу, дайын өнім экспортын ұлғайту және мақта кластерін кешенді дамыту мәселелеріне баса назар аударылды.
Аймақ басшысы мақта кластерінің дамуы Мақтаарал ауданы ғана емес, тұтас Түркістан облысының әлеуметтік-экономикалық дамуы үшін аса маңызды екенін атап өтті. Мақтадан дайын өнімге дейінгі толық өндірістік тізбекті қалыптастыру – өңірдің өнеркәсіптік әлеуетін арттырып, халықтың әл-ауқатын жақсартуға мүмкіндік беретін негізгі бағыттардың бірі.
Осылайша, Мақтаарал ауданында жүзеге асырылып жатқан жобалар ауыл шаруашылығы мен өнеркәсіпті ұштастыра отырып, өңірді экспортқа бағытталған, бәсекеге қабілетті аймаққа айналдыруға жол ашып отыр.
